ТАРБИЯИ ФАРЗАНД-КОРИ АВВАЛИНДАРАҶАИ ВОЛИДАЙН

   Хоруғ, 11 феврал. (АМИТ «Ховар», Л.Додо ). – Дар ҷамоати деҳоти Тавдеми ноҳияи Роштқалъа бо иштироки омӯзгорону волидайн, намояндагони мақомоти маҳаллии ҳокимияти давлатии ноҳия лоиҳаи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» мавриди баррасӣ қарор гирифт.   Раиси ҷамоати деҳот Гулнор Гадоалиева ва собиқадори меҳнат, ҷонишини директори мактаби рақами 10 Зумратшоҳ Ғуломшоев оид ба лоиҳаи Қонун, аҳамият ва сабаби ба муҳокимаи умум пешниҳод гардидани он андешаҳояшонро иброз намуда гуфтанд, ки солҳои пеш ба равнақи таълиму тарбия эътибори ҷиддӣ дода мешуд, вале имрӯз дар ин самт камбудиҳои зиёд вуҷуд доранд. Волидайн ба тарбияи фарзандонашон дуруст эътибор намедиҳанд, ба хотири огоҳ шудан аз хониши фарзандон ба мактаб намераванд.  Чанд нафар падару модар пиромуни ҷоннок намудани фаъолияти кумитаҳои падару модарон, бедор намудани меҳри наврасон нисбат ба китобхонӣ, мустаҳкам намудани алоқаи волидайн бо мактаб, гирифтани пеши роҳи тамошои фиттаҳои филмҳо ва сурудҳои беруназахлоқӣ ҳарф зада пешниҳод намуданд, ки волидайне, ки тарбияи фарзандонашонро кори дуюминдараҷа меҳисобанд, ба ҷавобгарӣ кашида шаванд.