ВАЗЪИ ТАЪМИНИ АҲОЛӢ БО ҚИТЪАИ ЗАМИН ДАР СУҒД

    Душанбе, 11 феврал. (АМИТ «Ховар», Бекназари Абӯбакр). — Баҳри таъмин намудани аҳолии эҳтиёҷманди вилояти Суғд бо қитъаи замини наздиҳавлигӣ то ин давра аз ҳисоби заминҳои лалмӣ ва чарогоҳ 9 868 гектар замин ҷудо гардид.    Аз хадамоти матбуоти раиси вилояти Суғд ба АМИТ «Ховар» иттилоъ доданд, ки баҳри иҷрои дастуру супоришҳои Сарвари давлат Эмомалӣ Раҳмон ва Ҳукумати Ҷумҳурии Тоҷикистон дар вилоят бо мақсади оқилона ва одилона тақсим намудани қитъаҳои замини наздиҳавлигӣ қарори Раиси вилоят аз 3 июни соли 2010 «Дар бораи комиссияи назоратии тақсимоти қитъаи замини наздиҳавлигӣ», комиссияи босалоҳият аз ҳисоби кормандони масъули ташкилотҳои вилоятӣ, собиқадорони меҳнат, намояндагони ҳизбҳои амалкунанда ва васоити ахбори омма дар ҳайати 51 нафар ба тавсиб расида, чунин комиссияҳо дар шаҳру ноҳияҳои вилоят низ фаъолият намуда истодаанд. Шумораи умумии аъзои комиссияи ҷамъиятии шаҳру ноҳияҳо зиёда аз 600 нафарро дар бар гирифта, дар ҷамоату шаҳракҳо низ комиссияҳо ташкил шудаанд.     Тибқи маълумоти аз тарафи шаҳру ноҳияҳо пешниҳодгашта, шумораи умумии аризадодагон дар миқёси вилоят то ин давра 108 481 нафарро ташкил медиҳад. Дар муддати сипаригашта 70 900 ариза аз тарафи комиссияҳо мавриди баррасӣ қарор дода шуда, 8 105 адад аризаи шаҳрвандон бинобар мутобиқ набудан ба қонунҳои амалкунандаи Ҷумҳурии Тоҷикистон рад шудаанд.   То ба имрўз ба 24 962 оила қитъаи замини наздиҳавлигӣ дода шудааст. Нашри рўйхати шаҳрвандони эҳтиёҷманд дар рўзномаҳои ноҳиявии Шаҳристон, Ашт, Спитамен, Панҷакент, Ғафуров ва Расулов ба роҳ монда шуда, ҷиҳати тақсими замин барномаҳои телевизионӣ пешкаши аҳолӣ мегарданд.     Масалан дар ноҳияи Мастчоҳ барои эҳтиёҷмандон 300 гектар замин ҷудо шуда, бо назардошти инфрасохтори маҳал мактабҳо, нуқтаҳои хизмати маишӣ, тиб ва дигар иншоот қитъаҳои замини боқимонда ба 2 160 нафар ба миқдори 0,10 гектар барои ҳар оила пешбинӣ шудааст. Ин нишондиҳанда мувофиқи ҷамоати шаҳраки Бўстон 277 нафар, ҷамоати деҳоти Авзикент 61 нафар, Палдорак 420 нафар ва Оббурдон 1 011 нафарро дар бар мегирад.    Баҳри тақсимоти одилонаи қитъаҳои замин бо қарори раиси ноҳия аз 14 июни соли 2010 комиссияи ноҳиявӣ бо роҳбарии Д.Норов- муовини раиси ноҳия ва 34 нафар аъзо аз ҳисоби кормандони ташкилоту муассисаҳои ноҳиявӣ ба тасвиб расид.   Ҳамзамон, чунин комиссияҳо дар ҷамоату шаҳракҳо бо ҷалби 67 нафар кормандони масъул таъсис дода шуда, то ин давра 2 160 адад аризаи шаҳрвандон баррасӣ ва ба комиссияи ноҳиявӣ пешниҳод шудаанд. Аз ин миқдор аризаи пешниҳодгашта то имрўз ба 1 769 оила қитъаи замин дода шудааст.