ҚАҲРАМОНМОДАРИ САДСОЛА

   Хоруғ,  9 март. (АМИТ «Ховар», Л.Додо). – Пайвандони  сокини  ҷамоати  деҳоти Барвози  ноҳияи  Роштқалъа  рӯзи  8 – уми   март  садумин  солгарди  зодрӯзи  Софиямо Замоноваро  ҷашн  гирифтанд.  Холаи  Софиямо 8 – уми   марти соли  1911  дар қарияи  Шоҳхиризми  ноҳияи  Роштқалъа  таваллуд  шудааст.      Ба  гуфти  худаш  шавҳараш  Сабздавлат Шуғниев марди  бо  нангу  ор  буд ва  рӯзгори оиларо  хуб таъмин  менамуд.  Дар  оила 7 писару 3  духтар ба  дунё меоянд. Ҳоло  холаи  София соҳиби  53  набераю  51  абера  мебошад. Соли  1959  бо  қарори  Президиуми Шӯрои  Олии  Иттиҳоди  Шӯравӣ  ба  Софиямо Замонова  ба  хотири  тавлиду  тарбияи  10  нафар   фарзанд  унвони  Қаҳрамонмодар  дода  шуд.    Холаи  Софиямо то синни  70 солагӣ дар  колхоз кор  кардааст. Ӯ  ҳоло ҳам бардам  қадам  мезанад. Холаи  Софиямо  мегӯяд, ки  дар  умраш  ҳатто  ба  бемории  зуком  гирифтор  нашудааст. Ӯ дарозумрии  худро  аввал  дар  иқлиму  ҳавои мусоид, об  ва  ғизои  тозаи  кӯҳистон  мебинад ва  мегӯяд, ки  баъдан тавлиди  фарзанди  зиёд  ба  саломатии  модар  судманд  аст.