ВАЗЪИ МУҲОҶИРАТИ МЕҲНАТӢ ДАР СУҒД

Душанбе, 4 март. (АМИТ «Ховар», Бекназари Абӯбакр). — Дар моҳи феврали соли равон аз шаҳру навоҳии вилояти Суғд 12 ҳазору 104 нафар шаҳрванд бо мақсади муҳоҷирати меҳнатӣ ба хориҷи кишвар сафар карданд. Дар ин бора ба АМИТ «Ховар» аз хадамоти матбуоти раиси вилояти Суғд иттилоъ доданд. Аз ҷумла, 10 ҳазору 384 нафар ба воситаи тайёра, 1 ҳазору 423 нафар бо қатора ва 297 нафар бо нақлиёти автомобилӣ сафар карданд. Аз ин теъдод 98 фоизи сафаркардагон ба Федератсияи Русия ва 1 фоизӣ ба давлатҳои Қазоқистону Украина рафтанд. Ҳамчунин, дар ин моҳ 5 ҳазору 900 нафар аз муҳоҷирати меҳнатӣ баргаштанд. Мавриди зикр аст, ки Хадамоти муҳоҷират дар вилояти Суғд феълан бо 7 субъекти хоҷагидор — ҶДММ «Нақлиёт», «Муҳоҷир», «Олами саёҳат», «Замони Юнус», «Суғдиён — Помиртур»-и шаҳри Хуҷанд, Маркази имкониятҳои иқтисодии шаҳри Истаравшан ва ҶДММ «Умури меҳнати ихтиёрии ҷавонон» ҳамкорӣ дорад. Ёдовар мешавем, ки фаъолияти фаврию хизматии Хадамоти муҳоҷират дар вилояти Суғд бо ҳадафи ташкили низоми ягонаи идоракунии муҳоҷирати меҳнатӣ, истифодаи самараноки захираҳои меҳнатӣ дар хориҷи кишвар ва ҳимояи ҳуқуқу манфиатҳои муҳоҷирони меҳнатӣ ташкил гардидааст.