ЗАНҲОИ ФАЪОЛИ НОҲИЯИ РӮДАКӢ

Шаҳраки Сомониён, 10 март.(АМИТ «Ховар», Ҳотам Рабиев).-Тавре мудири  Кумитаи кор бо занон ва оилаи назди мақомоти иҷроияи ҳокимияти давлатии ноҳияи Рӯдакӣ Роҳила Алибекова  ба хабарнигори АМИТ «Ховар» иттилоъ дод, зиёда аз 4 ҳазор занон дар вазифаҳои масъули давлатӣ, соҳаҳои  иқтисодиву иҷтимоӣ ифои вазифа менамоянд.Ӯ афзуд, ки аз ҷумла 34 нафар хизматчиёни давлатӣ, 3 мудири шӯъба, 4 раис, 6 муовини раис ва 5 котиби ҷамоат, 2 муовини сардухтури беморхонаи марказӣ, 12 сардухтури марказҳои саломатии деҳот, 225 раиси хоҷагиҳои деҳқонӣ аз ҳисоби занон мебошанд. Сарварии 12 иттиҳодияи ҷамъиятии дар ноҳия амалкунандаро низ занон ба ӯҳда доранд. Дар маъракаи интихоботии доиргашта 1 нафар зан ба вакилии Маҷлиси намояндагони Маҷлиси Олии Ҷумҳурии Тоҷикистон, 11 нафар ба маҷлиси вакилони халқи ноҳия ва 110 нафар зан ба маҷлисҳои ҷамоати шаҳраку деҳот интихоб гардиданд. Шумораи умумии занҳо дар соҳаи маориф 1 ҳазору 984 нафар, тандурустӣ 1 ҳазору 52 нафар, кишоварзӣ 1 ҳазору 135 нафарро ташкил медиҳад.