Ифтитоҳи Маркази табобати лазерии чашм дар Суғд

Душанбе, 28 июл. (АМИТ «Ховар», Лутфия Эшонқулова ).-Дар маҳаллаи «Гулистон»-и шаҳри Хуҷанд «Маркази табобатии лазерии чашм» ба истифода дода шуд. Дар ин бора ба АМИТ «Ховар» аз Хадамоти матбуоти раиси вилояти Суғд хабар доданд. Бино ба иттилои манбаъ, раиси вилояти Суғд Қоҳир Расулзода дар расми ифтитоҳи марказ иштирок намуда, бо утоқҳои ташхисиву табобатӣ ва таҷҳизоти замонавии онҳо ошно гардид. Директори «Маркази табобати лазерии чашм» Фазлиддин Шарифов аз мақсади таъсиси муассисаи табобатӣ нақл карда, аз ҷумла гуфт, ки ин муассиса баҳри баланд бардоштани дараҷаи хизмати тиббӣ ба мардуми вилоят созмон дода шудааст. Бино аз се ошёна иборат буда, дорои утоқҳои ташхис, муолиҷа, ҷарроҳӣ ва лазерӣ мебошад. Барои табобати беморон шароит муҳайё буда, дар як вақт 10 мизоҷ имконияти муолиҷаро дорад. Ташхис ва табобати касалиҳои чашм, ки дар ин ҷо ба роҳ монда хоҳад шуд, то кунун дар шаҳрҳои Маскав, Екатеринбург, Новосибирск, Тошканд ба анҷом мерасиданд. Аз ин пеш беморон маҷбур буданд, ки бо масрафи маблағи зиёд ба муолиҷагоҳҳои хориҷи кишвар муроҷиат кунанд. Минбаъд ташхиси ҳама гуна бемориҳои чашм ва табобату ҷарроҳии 10-12 намуд бемориҳои он дар ин марказ сурат мегирад. Бемор дар марказ ҳамагӣ 2-3 рӯз хобида ва ивази 200-600 сомонӣ, вобаста ба намуди касалӣ, ҷарроҳӣ ва даво карда мешавад. Бояд гуфт, ки дар Маркази табобати лазерии чашм 33 нафар кормандони тиб фаъолият мекунанд. Таҷҳизоти марказ асосан аз мамолики Федератсияи Русия, Фаронса, Ҷопон ва Ҷумҳурии мардумии Чин ба маблағи 180 ҳазор доллари ИМА харид шудаанд. Ба гуфти директори марказ, намояндаи Маҷлиси вакилони халқи вилоят Фазлиддин Шарифов барои эъмору таҳҷизонидани иншоот бонки «Имон интернейшл» қарзи имтиёзнок додааст.