Китобхонае, ки дар ИДМ назир надорад

Душанбе, 21 июл. (АМИТ «Ховар», Дилшодаи Хайруллоҳ).- «Беҳтарин дастовард ё тӯҳфаи арзишмандтарин барои миллати тоҷик ба истифода додани ду иншооти бузурги таърихӣ ва фарҳангӣ: Китобхонаи миллии Тоҷикистон ва Осорхонаи миллии ҷумҳурии Тоҷикистон мебошад», — гуфт ба хабарнигорони ВАО Вазири фарҳанги ҷумҳурӣ Мирзошоҳрух Асрорӣ.Мавсуф афзуд, ки китобхона бо охирин дастовардҳои технологияи китобдорӣ таъмин мешавад ва пешбинӣ гардидааст, ки ошёнаи сеюми он барои баргузории чорабиниҳои байналмилалӣ ҷудо карда шавад. Дар ҳолати пурра ба истифода додани китобхона он барои 10 миллион нусха китоб пешбинӣ гардидааст ва дар байни давлатҳои Иттиҳоди Давлатҳои Мустақил назир надорад.Ёдовар мешавем, ки бо мақсади мукаммалгардонии хазинаи Китобхонаи миллӣ бо адабиёт ва матбуоти даврии ватаниву хориҷӣ аз хазинаи захиравии Президенти мамлакат 543 ҳазору 586 сомонӣ маблағ ҷудо шудааст.. Тӯли солҳои 2010-2011 ба хазинаи Китобхонаи миллӣ аз шаҳрвандон, созмону ташкилот, донишкадаву сафоратҳои кишварҳои хориҷии муқими пойтахт 15 ҳазору 468 нусха адабиёти гуногунмазмун ворид гардидааст, қайд намуд М.Асрорӣ.Айни замон,- тазаккур дод М.Асрорӣ,- ба хазинаи Осорхонаи миллӣ 2 ҳазору 278 ёдгорӣ ва намунаҳои ҳунару ашёи муҳими таърихӣ ва фарҳангӣ тариқи харид, тӯҳфа ва ташкили экспедитсияҳои илмӣ ворид шудаанд. Илова бар ин аз Осорхонаи вилояти Суғд 740 нигора, аз вилояти Хатлон 279 нигора, аз шаҳру ноҳияҳои тобеи ҷумҳурӣ 31 нигора, дар маҷмӯъ 1050 нигора интихоб ва аксбардорӣ шудаанд.