Шаҳринав воқеан ба шаҳри нав табдил меёбад

Шаҳринав, 27 июл. (АМИТ «Ховар», Ҳотам Рабиев). – Ҳамаи сокинони Шаҳринав дастуру супоришҳои Сарвари давлатро сармашқи кори хеш қарор дода, аз ташрифи навбатии ӯ рӯҳу илҳоми тоза гирифтанд, иброз дошт муовини раиси ноҳия Шаҳринав Мусаллама Қодирова зимни нишасти матбуотӣ, ки дар мақомоти иҷроияи ҳокимияти давлатии ин ҷо баргузор гардид.Дар ҷамъомад муовинони раис, мудирони шӯъбаҳо, роҳбарони ташкилоту муассисаҳо ҳузур доштанд. Тавре М.Қодирова зикр кард, соҳаи кишоварзӣ яке аз соҳаҳои асосии истеҳсолот ба шумор рафта, дар он 6300 нафар шаҳрвандон кор мекунанд, ки 38,9 фоизи шумораи умумии коргарони ҳамаи сохтори истеҳсолиро ташкил менамоянд. Имсол боғпарварони ноҳияи Шаҳринав дар масоҳати 182,6 гектар боғу токзорҳои нав бунёд кардаанд, 139,6 фоизи нақшаи фаъолиятро ташкил менамояд.Деҳқонон бо мақсади афзун намудани маҳсулоти ғизоӣ дар масоҳати 1430 гектар кишти такрорӣ гузарониданд.Пайдоиши номи Шаҳринав ба солҳои 20 – уми асри ХХ рост меояд. Шояд он вақт бо се чор хонаи каму беш хуштарҳ ин номро гирифта буд. Аммо бунёдкорию ободкориҳои солҳои охир, махсусан баъди қарори Ҳукумати Ҷумҳурии Тоҷикистон дар бораи тасдиқи «Барномаи рушди иқтисодӣ — иҷтимоии ноҳия дар давраи соли 2015» ривоҷу равнақ ёфт. Шаҳринав рӯз то рӯз ободу зебо гардида, он рӯз дур нест, ки он воқеан ба шаҳри нав табдил ёбад.