Таъсиси факултаи нав дар ДДХ

Душанбе, 26 июл. (АМИТ «Ховар», Покиза Маҳмадбекова). – 25 июли соли равон дар Донишгоҳи давлатии Хуҷанд (ДДХ) нишасти матбуотӣ баргузор гардид.Ректори донишгоҳ, профессор Ваҳҳоб Набиев перомуни фаъолияти кормандони муассисаи таълимӣ дар давоми шаш моҳи соли равон ҳарф зада гуфт, ки байни факултаҳо ва бинои асосӣ барои иртиботи ҳамешагӣ шабакаи ягонаи компутерӣ таъсис ёфтааст. Ҳамзамон аксарияти факултаҳо бо шабакаи интернетӣ пайвастанд. Минтақаи таҷрибаомӯзии Палос, ки аз соли 1996 ин ҷониб бекор хобида буд, аз сари нав таъмиру таҷдид гардида ба истифода дода шуд. Ректор афзуд, ки дар нимаи аввали соли равон дар ДДХ 4 конфронси ҷумҳуриявӣ ва 1 Симпозиуми байналмиллалӣ баргузор гардид. Ба мақсади афзун намудани хазинаи китобхона маркази ДДХ дар давраи ҳисоботӣ 1 600 номгӯй китоб харид намуд. «Алҳол Донишгоҳ бо 16 донишгоҳи кишварҳои хориҷии дуру наздик тибқи шартнома ҳамкорӣ менамояд. Моҳи марти соли равон бо як муассисаи таълимии олӣ — Донишгоҳи Кентукии ИМА оид ба ҳамкории академӣ шартнома баста шуд», — афзуд дар хотима ректори донишгоҳ.Дар ин бора аз хадамоти матбуоти раиси вилояти Суғд иттилоъ доданд.