Ҳимматбаландии Раиси шаҳр дар моҳи Рамазон

Душанбе, 9 август.(АМИТ «Ховар», Марзия Саидова).- Раиси шаҳри Душанбе Маҳмадсаид Убайдуллоев ба муносибати фарорасии ҷашни 20-умин солгарди Истиқлолияти давлатӣ ва моҳи мубораки Рамазон ба 5057 нафар аҳолии пойтахт кӯмакпулии якдафаъина мерасонад. Маблағи умумии кӯмакпулиҳо беш аз ду миллион сомониро ташкил дода, он аз фонди захиравии Раиси шаҳр ва маблағҳои озоди буҷаи пойтахт ҷудо карда шудааст.Аз ҷумла, ба 202 нафар иштирокчиёни Ҷанги Бузурги Ватании /ҶБВ/ солҳои 1941-1945 ба андозаи 600 сомонӣ, ба 123 нафар шахсони бо ордену медалҳои ИҶШС барои меҳнати фидокорона ё хизмати бенуқсони ҳарбӣ дар ақибгоҳ дар солҳои ҶБВ сарфарозгардида ба ҳар кадоме 500 сомонӣ, 414 нафар шахсоне, ки зиёда аз шаш моҳ дар акибгоҳ кор кардаанд, 3 нафар муҳосирабудагони шаҳри Ленинград, 118 нафар маъюбони амалиётҳои ҷангӣ дар қаламрави давлатҳои дигар (Афғонистон), 169 нафар маъюбони рафъи садамаи нерӯгоҳи барқӣ-атомии Чернобил, ба пайвандони 296 нафар шахсоне, ки ҳангоми ҳимояи сохти конститутсионии Ҷумҳурии Тоҷикистон ҳалок гардидаанд, 6 нафар ҳамсарони ҷанговарони дар ҶБВ ҳалокгардида ва 928 нафар оилаҳои шаҳри Душанбе, ки дар онҳо аз ду нафар зиёд маъюб зиндагӣ мекунад, ба ҳар кадом ба андозаи 450 сомонӣ ва ба 2798 нафар кормандони Раёсати истифодабарии роҳҳои ноҳияҳои пойтахт ба ҳар кадоме 400 сомонӣ кӯмакпулии яквақта дода мешавад.Ин тадбир дар доираи анъанаи ҷойдошта ва татбиқи амалии сиёсати Сарвари давлат оид ба дастгирии иҷтимоии табақаҳои алоҳидаи эҳтиёҷманд андешида шудааст.Тибқи иттилои Шавкат Саидов, котиби матбуотии Раиси шаҳр, кӯмакпулиҳо то 18 август аз ҷониби муовинони Раиси шаҳр ва раисони ноҳияҳо дастраси шахсони зикршуда гардонида мешаванд.