Фаъолияти ҷамъияти тоҷикон дар вилояти Николаево

Душанбе, 17 август (АМИТ «Ховар», Пайрав Назаров). – Аз 11 то 13 август сафари кории Сафири Фавқулодда ва Мухтори Ҷумҳурии Тоҷикистон дар Украина Шӯҳрат Султонов дар вилояти Николаевои Украина сурат гирифт. Зимни мулоқот бо иҷрокунандаи вазифаи раиси маъмурияти давлатии вилояти Николаево Геннадий Николенко роҳбарияти вилоят ҷонибдории пайгиронаи худро аз рушди ҳамкории иқтисодӣ бо минтақаю вилоятҳои Тоҷикистон, барқарор намудани равобити истеҳсолии миёни корхонаҳои Украина ва Тоҷикистон, тарбияи мутахассисони соҳаи саноат ва зироат иброз дошт. Ҳамчунин дипломати тоҷик бо роҳбарияти Донишгоҳи миллии ба номи Макаров, ки донишгоҳи асосии техникии Украина маҳсуб мешавад, мулоқот намуд.Сафири Тоҷикистон дар Украина ҳамчунин бо намояндагони ҷамъияти тоҷикон дар вилояти Николаево сӯҳбат намуд. Сафир зимни сӯҳбат ба шароити зиндагӣ ва кори ҳамватанон, ҳамоҳангсозии фаъолияти ҷамъият, ҳалли проблемаҳои мавҷуда, ҳифзи ҳуқуқу манфиатҳои шаҳрвандони Тоҷикистон таваҷҷӯҳи хоса зоҳир намуд.