Истифодаи нерӯи имомхатибон дар моҳи шарифи Рамазон

Душанбе, 2 август.(АМИТ «Ховар», Марзия Саидова).-Дар моҳи мубораки Рамазон санҷишҳои мақомоти дахлдори назоратии давлатӣ, ба истиснои Хадамоти санитарию байторӣ дар бозорҳои пойтахт қатъ карда мешавад. Ин тадбир бо мақсади коҳиш додани нархи маҳсулот дар моҳи Рамазон андешида шудааст. Матлаби мазкур дар ҷаласаи шаҳрдорӣ, ки таҳти раёсати Маҳмадсаид Убайдуллоев, раиси шаҳри Душанбе бо иштироки масъулини сохторҳои дахлдори шаҳрдорӣ, соҳибкорони ба интиқол ва фурӯши маҳсулоти гӯштӣ ва маводи сӯзишворӣ машғулбуда, имомхатибони масҷидҳои панҷвақта ва ҷомеъ баргузор гардид, зикр шуд.Ҳамчунин зикр шуд, ки комиссияи марбутаи депутатию ҷамъиятӣ нисбат ба масъалаи аз ҷамъоварии яквақтаинаи маблағҳо дар тамоми бозорҳо озод намудани соҳибкорони ба фурӯши маҳсулоти ғизоӣ машғулбуда зимни омӯзиш унвонии шаҳрдорӣ таклиф ирсол намоянд. Барои тақвияти корҳои оммавӣ ҷиҳати дар моҳи шарифи Рамазон даст задан бо кори хайр ва аз рӯи инсоф кор гирифтан дар савдои молу маҳсулот дастур дода шуд, ки нерӯи имомхатибони масҷидҳои ҷомеъ ва панҷвақтаи Душанбе ба ин самт равона карда шавад. Бо ин мақсад муқаррар гашт, ки ба бозорҳои коммуналӣ имомхатибони масҷидҳои ҷомеъ ва ба бозорҳои хусусӣ имомхатибони масҷидҳои панҷвақта вобаста карда шаванд.Дар ҷаласа дар робита ба масъалаи маводи сӯзишвории нақлиётӣ соҳибкорон иқдом намуданд, ки дар моҳи Рамазон шурӯъ аз 2 августи соли ҷорӣ дар ҳама нуқтаҳои фурӯши маводи сӯзишворӣ дар шаҳр новобаста аз шакл ва тобеияти идоравӣ 1 литр бензини навъи АИ-92 бо нархи 6 сомонию 20 дирам ва гази моеъро бо нархи 2 сомонию 90 дирам ба фурӯш мегузоранд