Кӯмаки Хадамоти муҳоҷирати ҶТ ба оилаи тоҷик

Душанбе, 25 август (АМИТ «Ховар», Азиз Хайруллоев). – «Муҳоҷирони меҳнатии дар қаламрави Русия будаи Тоҷикистон аксаран дучори вазъияти ногувор мегарданд», — зикр шуд дар дафтари матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон.Яке аз оилаҳои тоҷики муқими Русия дучори имтиҳони сахте гардид. Шавҳари Гуландом Ҳамроқуловаи 37 – сола тарки оила намуда, 3 кӯдаки хурдсолро дар ихтиёри ҳамсараш танҳо гузошт. Гуландом Ҳамроқулова баъди ин маҷбур буд, ки аз сохторҳои расмии Тоҷикистон дар Русия хоҳиш намояд, ки барои ба шаҳри Душанбе бурдани фарзандонаш ёрӣ расонанд. Хадамоти муҳоҷирати назди Ҳукумати Ҷумҳурии Тоҷикистон якҷоя бо ҷамъияти тоҷикон ва созмонҳои ғайриҳукуматӣ ба ӯ барои баргаштан ба Ватан дасти ёрӣ дароз карданд.«Ҳамаи мо, тоҷикистониёне, ки берун аз хоки Ватан кор мекунем, даъвати Президенти Ҷумҳурии Тоҷикистон Эмомалӣ Раҳмонро дар мавриди ҳамаҷониба дастгирӣ намудани шаҳрвандоне, ки ба он мӯҳтоҷанд, сармашқи амали худ қарор медиҳем. Ин кӯмаки мо хусусан дар моҳи Шарифи Рамазон аҳамияти хосса пайдо менамояд», — зикр шуд дар дафтари матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон.