Махзани илму маърифат мукаммал мегардад

Душанбе, 1 август.(АМИТ «Ховар», Марзия Саидова).-Ҳайати устодону донишҷӯёни Донишкадаи исломии Тоҷикистон ба номи Имоми Аъзам Абӯҳанифа бобати мукаммал гардонидани хазинаи Китобхонаи миллии ҷумҳурӣ ба ин махзан беш аз 3 ҳазор китобу адабиёт тақдим намуданд. Китобҳои ҷамъовардаи устодону донишҷӯён асосан бадеию публисистӣ, илмию оммавӣ ва динӣ мебошанд, иттилоъ доданд аз Донишкадаи мазкур.Ғайр аз ин хазинаи китобхонаи Донишкада сол аз сол мукаммал гардида, танҳо дар моҳи январи соли равон шӯъбаи китобдории Донишкадаи исломии Тоҷикистон ба хазинаи китобхона 1600 китоб ворид намуд. Алҳол, дар китобхонаи Донишкада беш аз 5 ҳазор китоби гуногуни илмию бадеӣ нигоҳ дошта мешаванд. Ҳамзамон, ректори Донишкадаи исломии Тоҷикистон зимни сафари худ ба Ҷумҳурии Туркия ҳудуди сад адад китобро аз донишгоҳҳои ин кишвар ба ҷумҳурӣ оварда, ба хазинаи китобхонаи Донишкада супорид.