Овоза ё ҳақиқат?

Душанбе, 25 август.(АМИТ «Ховар», Марзия Саидова).- Имрӯзҳо дар байни аҳолӣ, хусусан мактаббачагон овозае ҳаст, ки гӯё соли нави таҳсили 2011-2012 баъди таҷлили ҷашни 20-умин солгарди Истиқлолияти давлатии Ҷумҳурии Тоҷикистон оғоз меёфта бошад. Ин овоза то чӣ андоза ба ҳақиқат наздик аст? Ҷиҳати рушанӣ андохтан ба ин масъала хабарнигори АМИТ «Ховар» ба Ноилшо Нуралиев, сардори маркази матбуоти Вазорати маорифи ҷумҳурӣ муроҷиат кард. Ноилшо Нуралиев зимни посух гуфт, ки ин ҳама овоза буда, ба ҳақиқат наздик нест. Соли нави таҳсил чун анъана ва ҳамасола 1 сентябри соли 2011 оғоз меёбад. Мавсуф афзуд, ки 1 сентябр Рӯзи дониш ва ҳам дарси Сулҳ аст. Дар ин рӯз занги аввалин садо дода, тамоми мактаббачагону толибилмонро паси мизҳои мактабӣ даъват менамояд.Дар мавриди либоси ягонаи мактабӣ Ноилшо Нуралиев афзуд, ки аз соли 2007 инҷониб дастурамали либосҳои тавсиявӣ барои муассисаҳои таҳсилоти умумӣ, ибтидоӣ, миёна, миёнаи махсус ва олии касбӣ қабул ва ба тамоми муассисаҳои таълимии кишвар пешниҳод шудааст.