Пирӯзии навбатии десантчиёни ҷавон

Душанбе, 9 август. (АМИТ «Ховар», Дилшодаи Хайруллоҳ).- Клуби «Десантчиёни ҷавон» — и Ташкилоти Ҷамъиятии Мададгори Мудофиа дастовардҳои варзишии худро, ки дар мусобиқоти сатҳи ҷумҳуриявӣ ва байналхалқӣ зери сарпарастии мураббии ботаҷриба Аскар Кароматов ба даст овардаанд, торафт ғанӣ месозад. Дар мусобиқоти байналмилалӣ оид ба каратэ – кёкушинкай, ки дар ҳамсоякишвари Қирғизистон доир шуд, варзишгарони клуб Қурбонзода Муслим, Даврон Сулаймонов, Сиёвуш Асламшоев, Сироҷиддин Ҷалилов, Сиёвуш Амонов, Сӯҳроб Назаров ва Файзулло Кароматов мақоми аввалро соҳиб гардида, медали тилло ба даст оварданд. Парвиз Арабов, Амирҷон Султонов ва Парвиз Кароматов ҷойҳои дуюмро ишғол карданд. Меҳроҷиддин Ҷалилов сазовори медали биринҷӣ шуд. Дар ин мусобиқа дастаҳои мунтахаби кишварҳои Русия, Тоҷикистон, Қирғизистон, Туркманистон, Ӯзбекистон ва Қазоқистон ширкат варзиданд.Инчунин Юлдошев Давронбек дар Ҷоми ҷаҳон оид ба самбои муҳорибавӣ, ки дар ибтидои моҳи июли соли равон дар шаҳри Сочи доир шуд, мақоми дуюмро ишғол намуд.