«Сангтӯда-2»- қадами устуворе ба сӯи Истиқлолияти энергетикӣ

Душанбе, 17 август.(АМИТ «Ховар», Марзия Саидова).- Агрегати якуми Нерӯгоҳи барқи обии «Сангтӯда-2», ки яке аз иншооти муҳими стратегӣ маҳсуб меёбад, дар остонаи ҷашни 20-умин солгарди Истиқлолияти давлатии Ҷумҳурии Тоҷикистон ба истифода дода мешавад. Интизор меравад, ки дар маросими ба истифода додани НБО «Сантӯда-2» Сарони давлатҳои Тоҷикистону Эрон ширкат варзанд.Назар ба иттилои раиси мудирияти дастгоҳи назорати техникӣ дар НБО «Сангтӯда-2» Маҳмадамин Сафархолов корҳои сангу хокбардорӣ ва сангу хокрезӣ дар ҳамаи иншооти нерӯгоҳ беш аз ду миллион метри мукааб, хусусан дар минтақаи бунёдшудаи иншооти нерӯгоҳ беш аз 1 миллиард метри мукааб ба сомон расонида шудааст. Дар ҳамаи қисмҳои таркибии иншоот корҳои сохтмонию васлгарӣ шабонарӯзӣ идома дошта, то ба имрӯз корҳои сохтмонию васлгарии иншооти олати тақсимоти кушода ба пуррагӣ ба анҷом расонида шуда, таҷҳизоти гидравлии нерӯгоҳ, аз қабили дарвозаҳои вуруду хуруҷ ва аслии иншооти обпарто ва худи иншооти обпарто мавриди баҳрабардорӣ қарор гирифтаанд.Маҳмадамин Сафархолов афзуд, ки корҳои сангу хокрезӣ тавассути шиббакунӣ беш аз 394 000 метри мукааб, аз ҷумла дар бандаки болоӣ беш аз 189 000 метри мукааб дар бандаки поёнӣ бошад зиёда аз 54 000 метри мукааб ва қисми мобайнии он беш аз 150 000 метри мукааб расонида шудааст. Инчунин, кӯбидани динамикӣ дар се марҳилла ба анҷом расонида шуда, корҳои сангу хокрезии баданаи сад, поло, заҳкаш, маркази он ва девори оббанди сад бо суръат идома дорад. Ҳамзамон, корҳои шабонарӯзӣ барои васлу насби ҳар ду гидроагрегати нерӯгоҳ, ки тавоноии онҳо 220 мегаваттро ташкил медиҳад, идома дошта, корҳои васлу насби трубинаи гидроагрегат дар арфаи анҷомёбист. Инчунин, системаҳои зиддисӯхтор ва бообхунуккунии долонҳо ба пуррагӣ ба итмом расонида шудааст. Бояд тазаккур дод, ки алҳол дар ин иншооти муҳими стратегӣ 867 нафар мутахассисон кор менамоянд, ки аз он 585 нафарашро мутахассисони маҳаллӣ ва 282 нафарашро мутахассисони эронӣ ташкил медиҳанд. Иншооти мазкур дар доираи ҳамкориҳои мутақобилан судманди Тоҷикистону Эрон сохта шуда, дар бунёди он ширкатҳои «Фароб», «Умронӣ», «Мурун», «Маҳоби Қудс», «Фановарии навини нерӯ», «Тарванд тадбир » «Сангоб», ширкати пружаи сад ва нерӯгоҳи «Сангтӯда- Сангоб» (фармоишгар) саҳм гузоштаанд.  Дар ин ҷо шаҳрча сохта шудааст, ки дорои тамоми шароити мусоид барои кормандону мутахассисони иншоот аст.Маврид ба ёдоварист, ки тибқи Созишномаи Ҳукумати Ҷумҳурии Тоҷикистон ва Ҳукумати Ҷумҳурии Исломии Эрон иншооти мазкур мебоист моҳи феврали соли 2012 ба истифода дода мешуд. Аз ин рӯ, бо мақсади сари вақт бунёд кардани нерӯгоҳ таҷҳизоти он бо роҳи оҳан, роҳи ҳавоӣ, тавассути марзи Афғонистон, Чин –Қирғизистон ба воситаи трайзерҳо -нақлиёти боркаш ва тайёраҳо ба маҳали сохтмон дастрас карда шудаанд. Аз ҷумла, ду адад трансформатори иншоот ба воситаи таёраи боркаши «РУСЛАН» ба фурудгоҳи байналмилалии Душанбе оварда шуда, баъдан ба тавассути трайзкрҳо ба маҳали сохтмони иншоот интиқол дода шудааст.НБО «Сангтӯда-2», ки дар 100 километрии қисмати ҷануби Душанбе сохта шудааст, дар як сол бо иқтидори 1 миллиард киловатт соат-нерӯи барқ истеҳсол менамояд. НБО «Сангтӯда-2» аз силсиланерӯгоҳоест, ки дар дарёи Вахш бунёд гардида, сохтмонаш моҳи феврали соли 2006 оғоз гардида буд.