Шеъри ӯро дӯш дар гаҳвора аз бар кардем…

Душанбе, 8 август (АМИТ «Ховар», Ҳотам Рабиев). – Ҳукумати Ҷумҳурии Тоҷикистон бо мақсади дар сатҳи баланд ва сазовор истиқбол гирифтани 100 – солагии Қаҳрамони Тоҷикистон, Шоири халқии Тоҷикистон Устод Мирзо Турсунзода силсилаи чорабиниҳоро ба нақша гирифтааст, ки як қисмати онҳо аллакай иҷро гардида, қисмати дигар дар давоми сол иҷро хоҳанд шуд. Аз ҷумла, моҳи октябр дар шаҳри Душанбе маросимҳои ҷашнӣ доир хоҳанд шуд. Тибқи нақша маҷлиси тантанавӣ, консерти идона бо иштироки меҳмонони хориҷӣ, конфронси илмӣ, базми шеъру суруд низ доир мегардад. Ҳамчунин таъмиру таҷдиди хона – музеи устод М.Турсунзода дар шаҳри Душанбе, шаҳри Хуҷанд ва дар деҳаи Қаротоғ бояд ба анҷом расад. Китобҳои «Мунтахаби ашъор» — и Мирзо Турсунзода (ба забонҳои тоҷикӣ, форсӣ, русӣ, англисӣ, арабӣ ), «Турсунзода дар ёдҳо», таҳия ва нашри рисолаи «Бозтоби анъана дар эҷодиёти Мирзо Турсунзода» дастраси хонандагон хоҳад гашт. Ғайр аз ин дар кулли манотиқи ҷумҳурӣ чорабиниҳои гуногуни фарҳангӣ бахшида ба 100 – солагии устоди назм идома дорад.