Тақсими замини лалмӣ идома дорад

Кӯлоб, 1 август (АМИТ «Ховар», С. Холов). – Бахши сохтмону меъморӣ ва шаҳрсозии ноҳияи Мӯъминобод дар шаш моҳи соли ҷорӣ аз ҳисоби ба расмиятдарории ҳуҷҷатҳои қитъаҳои замини наздиҳавлигӣ ва сохтмони биноҳои хусусӣ ба маблағи 21 ҳазору 420 сомонӣ корҳоро ба анҷом расонид. Маҳмадраҷаб Хоҷаев, сармеъмори ноҳия, дар робита ба ин мавзӯъ гуфт, ки мувофиқи қарори Ҳукумати ҶТ дар ноҳия бояд 152 гектар замин ҳамчун қитъаи наздиҳавлигӣ барои сохтмони хонаҳои истиқоматӣ ҷудо карда шавад, ки аз ин ҳисоб то имрӯз 10,28 га замин ҷудо гардидааст. Мавриди зикр аст, ки айни ҳол 35 гектар замини манзилӣ ба 252 оилаи ҷамоатҳои деҳоти Балхобӣ, Кулчашма, Туту, шаҳраки Ленинград, Боғитай ва Деҳибаланд тақсим карда шуда, мувофиқи нақша то охири моҳи августи соли ҷорӣ 1091 оила соҳиби қитъаи манзил мешаванд.