Шоу- барномаҳои идонаи ройгон дар Диснелейнди Душанбе

Душанбе, 7 сентябр.(АМИТ «Ховар», Марзия Саидова).- Иншооти мӯҳташами ҷашнӣ, ба истилоҳ Диснейленд — Боғи пойтахт, ки шоми 6 сентябри соли 2011 дар маросими ботантана бо иштироки Президенти мамлакат Эмомалӣ Раҳмон ба истифода дода шуд, армуғони идонаест барои сокинон ва меҳмонони Душанбе. Бояд тазаккур дод, ки Боғи умумишаҳрӣ, ки бо усули меъёрҳои муосир дар яке аз гӯшаҳои зебоманзари Душанбе бунёд гардидааст, дар миқёси минтақаи Осиёи Марказӣ назир надоштааст.Дар робита ба ин тибқи дастури Маҳмадсаид Убайдуллоев, Раиси шаҳри Душанбе баҳри фароғати идонаи сокинон ва меҳмонони пойтахт шоми рӯзҳои 7, 8, 9, 10 ва 11 –уми сентябри соли равон дар Боғи мазкур шоу барномаҳои идона ва армуғони ҷашнӣ ба таври ройгон пешниҳоди сокинон ва меҳмонони Душанбе гардонида мешавад.Шавкат Саидов, котиби матбуотии Раиси шаҳр мегӯяд, ки шаҳрдории Душанбе дар робита бо анҷом додани иқдоми мазкур аз ҳамаи сокинон ва меҳмонони пойтахт эҳтиромона даъват ба миён меорад, ки бо риояи фарҳанги баланду ҳамидаи шаҳрнишинӣ аз боғ ва шоу- барномаҳои идонаи он дидан намоянд.