Мусобиқаи маъюбон дар Қурғонтеппа

Қурғонтеппа, 25 октябр. (АМИТ «Ховар», Мурод Сотиев). — Рӯзҳои истироҳатӣ дар шаҳри Қурғонтеппа мусобиқаи пойгаҳи марафонӣ ба масофаи 5 ҳазор метр ва 500 метр бо аробача ва мусобиқа оид ба дастхобонӣ миёни маъюбон ифтитоҳ гардид, ки он ба 20-солагии истиқлолияти давлатии ҶТ бахшида шуд. Тавре ки аз идораи кор бо ҷавонон, варзиш ва сайёҳии вилояти Хатлон ба АМИТ «Ховар» иттилоъ доданд, мусобиқа дар ҳамкорӣ бо федератсияи маъюбони ҶТ ташкил гардид. Дар марафон 30 нафар ва дар мусобиқаи дастхобонӣ 35 нафар варзишгар аз шаҳру навоҳии ҷумҳурӣ ширкат ва қувваозмоӣ намуданд. Дар мусобиқаи пойгаҳи марафонӣ ба масофаи 5 ҳазор метр ҷойи аввалро Сафар Боеви душанбегӣ, зинаи дуюмро Хайрулло Абдураҳимови хатлонӣ ва ҷойи сеюмро Парвиз Бобошарипови душанбегӣ сазовор гардиданд.Дар мусобиқаи дастхобонӣ низ ғолибон муайян шуда, ба ҳамаи онҳо ифтихорномаҳо ва тӯҳфаҳои идораи кор бо ҷавонон, варзиш ва сайёҳии вилояти Хатлон супорида шуд.