Сафари кории Оқил Оқилов ба вилояти Суғд

Душанбе, 14 октябр. (АМИТ «Ховар», Бекназари Абӯбакр). — Сарвазири мамлакат Оқил Оқилов 13 октябр ба вилояти Суғд сафари корӣ намуда, бо вазъи соҳаҳои хоҷагии халқи вилоят, рафти омодагӣ ба зимистонгузаронӣ дар муассисаҳои соҳаҳои иҷтимоӣ аз наздик шинос гардида, бо роҳбарияти вилоят мулоқот доир намуд.Оқил Оқилов  бо фаъолияти корхонаҳои саноатии вилоят ошно гардида, ба мутахасссисону масъулини соҳа ҷиҳати самаранок истифодабарии захираҳои мавҷуда, таъсиси ҷойҳои нави корӣ дастуру супоришҳо дод.Сарвазири мамлакат ба корхонаи маъдантозакуниии  Адрасмони шаҳри Қайроққум омада, бо вазъи корхонаи мазкур, ки дар коркарди маъданҳои нодир аз корхонаҳои калонтарини мамлакат ба ҳисоб меравад, аз аз наздик шинос гардид.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Оқил Оқиловро дар ин сафар Раиси вилояти Суғд Қоҳир Расулзода, раиси Кумитаи давлатии заминсозӣ ва геодезии Ҷумҳурии Тоҷикистон Маҳмадтоир Зокиров, раиси Кумитаи давлатии сармоягузорӣ ва идораи амволи давлатӣ Давлаталӣ Саидов, сардори Саридораи геологияи ҷумҳурӣ Азим Иброҳим ва роҳбарони як қатор идораҳои ҷумҳуриявӣ ва вилоятӣ ҳамроҳӣ намуданд.