Анҷоми мусобиқаи байналмилалӣ оид ба самбо

Душанбе, 29 ноябр. (АМИТ «Ховар», Аловиддин Бӯриев). – Дар давоми ду рӯз дар маҷмааи варзишии навбунёди “Моҳи нав”-и шаҳри Душанбе мусобиқаи байналмилалии самбо барои дарёфти ҷоизаи шодравон Саидмӯъмин Раҳимов баргузор шуд. Дар ин мусобиқа, ки бори дуввум гузаронида мешавад, тақрибан 150 паҳлавон аз минтақаҳои гуногуни кишвар ва танҳо се нафар паҳлавон аз Қазоқистон ширкат карданд. Ба ин мусобиқа мебоист тибқи даъват паҳлавонони Афғонистон, Қирғизистон, Ӯзбакистон ва Эрон низ ширкат мекарданд , вале онҳо ба мусобиқа ҳозир нашуданд. Дар натиҷа Акмалиддин Каримов (Душанбе, 52 кг), Хушқадам Хисравов (ВМКБ, 57 кг), Миралӣ Муҳибуллоев (Хатлон, 62 кг), Мустафо Ҳасанов (Душанбе, 68 кг ), Нусрат Имомов (Хатлон, 74 кг), Зайналобиддини Аъзам (Хатлон, 82 кг), Ҷумъахон Назриев (Хатлон, 90 кг), Фирдавс Орифов (Душанбе, -100 кг), Зиёратшо Баротов (Душанбе, +100 кг) дар вазнҳои худ ғолиб омада, бо медал ва тӯҳфаҳои таъсисшудаи Кумитаи ҷавонон, варзиш ва сайёҳии Тоҷикистон ва Федератсиюни самбои мамлакат сарфароз гардонида шуданд. Ҷоми ёдбуд ба Фирдавс Орифов, ки дар вазни то 100 кг ғолиб омад, супорида шуд, зеро Саидмӯъмин Раҳимов соли 1975 маҳз дар ҳамин вазн чемпиони ҷаҳон гашта буд.