Футболбозони тими мунтахаб дар Тошканд

Душанбе, 15 ноябр. (АМИТ «Ховар», Аловиддин Бӯриев). – Имрӯз дастаи мунтахаби Тоҷикистон соати 18 дар варзишгоҳи «Пахтакор»-и шаҳри Тошканд вохӯрии навбатии худро дар даври панҷуми марҳилаи аввали гурӯҳии муқаддамотии Ҷоми ҷаҳон – 2014 бо дастаи мунтахаби Ӯзбекистон мегузаронад. Дирӯз футболбозони мо тамрини худро дар ҳавои сарду номусоид, зери бориши барф барпо карданд. Дар нишасти матбуотие, ки субҳи имрӯз барпо гардид, маълум шуд ,ки ҳамлагари дастаи мунтахаби Ӯзбекистон Максим Шатских дар бозӣ бо тими мо иштирок нахоҳад кард. Сармураббии мизбонҳо Вадим Абрамов изҳор доштааст, ки мақсади дастааш дар гурӯҳ ишғол кардани мақоми аввал мебошад. Алҳол Ҷопон ва Ӯзбекистон бо 10 имтиёзӣ дар садри гурӯҳи «С» ҷойгир шудаанд ва бозии охирини ин дастаҳо дар Ҷопон метавонад ба ин масъала рӯшанӣ андозад. Дар ин гурӯҳ имрӯз ҳамчунин бозии байни дастаҳои Куриёи халқӣ- демократӣ бо Ҷопон дар назар аст. Ғайр аз бозиҳо дар гурӯҳи «С» дар минтақаи Осиё шоми имрӯз ҳамчунин дар гурӯҳи «А» дастаҳои Сингапур бо Чин ва Урдун бо Ироқ, дар гурӯҳи «Б» Лубнон бо Кореяи Ҷанубӣ ва Кувайт бо Амороти Муттаҳидаи Араб, дар гурӯҳи «Д» Таиланд бо Австралия ва Арабистони Саудӣ бо Уммон, дар гурӯҳи «Е» Индонезия бо Эрон ва Қатар бо Баҳрайн вомехӯранд.