Интернет маҳбубияти бештар касб мекунад

Душанбе, 30 ноябр. (АМИТ «Ховар», Лаззат Диловарзод).- Бино ба иттилои Хадамоти шиносномадиҳӣ ва бақайдгирии Вазорати корҳои дохилии (ВКД)- и ҶТ, хадамоти мазкур шӯъбаҳои худро дар тамоми қаламрави ҷумҳурӣ ба шабакаи интернет пайваст менамояд. Мақсад аз он бо роҳи осон ва бе харҷи иловагӣ дастрас намудани нусхаҳои шиносномаю шаҳодатномаҳо дар бораи таваллуд тавассути интернет ва дар ҳамаи гузаргоҳҳои сарҳадӣ ба қайд гирифтани муҳоҷирони меҳнатӣ мебошад.Ба иттилои манбаъ, ҳамасола ба Хадамоти шиносномадиҳӣ ва бақайдгирии ВКД наздик ба 14 ҳазор ариза барои гирифтани ҳуҷҷатҳои муайянкунандаи шахсият ворид мегардад. Аксарияти аризаҳо аз номи муҳоҷирони меҳнатӣ, ки дар хориҷи кишвар кору фаъолият доранд, ворид шуда, боиси хароҷоти зиёди омаду рафти муроҷиаткунанда мегардад. Акнун бо мақсади осон гардонидани гирифтани нусхаи шиноснома ва дигар ҳуҷҷатҳои муайянкунандаи шахсият бе омаду рафти шаҳрванд онро тавассути интернет ба даст овардан мумкин аст.Бо дастгирии молиявии Созмони байналмилалии муҳоҷират мақомоти роҳбарикунандаи Хадамот 10 шӯъбаи аввалини худро дар ВМКБ, вилоятҳои Суғду Хатлон ва ноҳияҳои тобеи ҷумҳурӣ ба шабакаи интернет пайваст менамояд