Валентин Иванов дар хотираҳо хоҳад монд.

Душанбе, 9 ноябр. (АМИТ «Ховар», Аловиддин Бӯриев). – Яке аз мураббиёни беҳтарини Иттиҳоди Шӯравӣ ва бозингари шӯҳратёр  Валентин Иванов аз дунё чашм пӯшид. Ӯ тақдири худро ба дастаи «Торпедо»-и Маскав пайваста дар ҳайати он 286 бозӣ карда, ба дарвозаи ҳарифон 124 гол задааст. Дар ҳайати дастаи мунтахаби Иттиҳоди Шӯравӣ 26 маротиба тӯбро вориди дарвозаи ҳарифон гардонида, аз рӯи ин нишондиҳанда баъди Олег Блохин ва Олег Протасов ҷой гирифт. Чемпиони Иттиҳоди Шӯравӣ ва соҳиби ҷоми он кишвар дар соли 1960, чемпиони бозиҳои олимпӣ дар соли 1956, барандаи ҷоми Аврупо дар соли 1960, соҳиби медали нуқраи ҷом дар соли 1964, иштирокчии чемпионатҳои ҷаҳон дар соли 1958 ва 1962, нишонзани беҳтарини чемпионати ҷаҳон дар соли 1962 буд. Валентин Иванов ба ҳайси сармураббии дастаи «Торпедо»-и Маскав панҷ маротиба кор кардааст. Як маротиба чемпиони СССР ва се маротиба ҷоми онро ба даст овардааст.