Вазъи омодагӣ ба зимистон баррасӣ шуд

Хоруғ, 26 ноябр. (АМИТ «Ховар», Л.Додо ). – Зимистони имсола ба Бадахшон барвақт омада ва аз ин лиҳоз маъмурияти ҳамаи идораю муассисаҳои вилоят саъю кӯшиш доранд, ки ба он комилан омода бошанд. Тибқи ахбороти муовини сардори Сарраёсати молияи вилоят Мирзоҷон Мирзоҷонов, соли равон аз буҷаи вилоят барои хариди ангишту ҳезум ва дигар манбаъҳои гармидиҳӣ барои соҳаҳои бахши иҷтимоӣ ва дигар идораву муассисаҳо 5 миллиону 139 ҳазор сомонӣ ҷудо гардида, вале ин маблағҳо на ҳама вақт оқилона истифода мешаванд. Сарраёсати молияи вилоят вазифадор гардид, ки вазъи истифодаи мақсадноки маблағҳои барои омодагӣ ба зимистон ҷудошударо ба таври дақиқ санҷад.