Афзоиши корхонаҳои истеҳсоли пӯсту пашм

Душанбе, 26 декабр. (АМИТ «Ховар», Бекназари Абӯбакр). — Бо дастгирии Вазорати энергетика ва саноати Ҷумҳурии Тоҷикистон дар доираи иҷрои «Барномаи коркарди пурраи ашёи хоми чорво (пӯст ва пашм) дар Ҷумҳурии Тоҷикистон барои давраи то соли 2015» дар шаҳри Душанбе боз як корхонаи нави коркарди пӯст бо иқтидори 250 ҳазор дона коркарди пӯсти чорвои калону майда ба фаъолият шурӯъ намуд. Аз Вазорати энергетика ва саноат ба АМИТ «Ховар» иттилоъ доданд, ки корхонаи мазкур ҶММ «Тоҷикинтиқол» номгузорӣ шуда, дар он 40 нафар бо ҷойи кор таъмин шуданд. Корхона бо техникаву таҷҳизоти замонавии истеҳсоли Ҷумҳурии Мардумии Чин ҷиҳозонида шудааст.Ёдовар мешавем, ки дар айни ҳол дар ҷумҳурӣ иқтидори умумии корхонаҳои коркарди пӯст ба 2 млн. 200 ҳазор дона расидааст.