Тоҷикистону Украина Шӯрои тоҷиронро таъсис медиҳанд

Душанбе, 22 декабр. (АМИТ «Ховар», Покиза Маҳмадбекова ). – Дар ҷараёни сафари расмии Президенти Тоҷикистон Эмомалӣ Раҳмон ба Украина дар маъмурияти Президенти Украина маросими имзои Созишнома дар бораи ташкили Шӯрои тоҷирони Тоҷикистону Украина баргузор гардид. Ҳуҷҷатро раиси Палатаи савдо ва саноати Тоҷикистон Шариф Сайид ва президенти Палатаи савдо ва саноати Украина С. Скрипченко имзо намуданд. Тавре дар маркази матбуоти Палатаи савдо ва саноати ҷумҳурӣ иттилоъ доданд, мақсади асосии ташкили Шӯрои тоҷирон иборат аз рушди равобити тоҷирон ва ҳамкории мутақобилан муфиди миёни соҳибкорони Украинаю Тоҷикистон, ҳифзи ҳуқуқу манфиатҳои қонунии соҳибкорони Тоҷикистон ва Украина мебошад.Худи ҳамон рӯз дар бинои Палатаи савдо ва саноати Украина форуми аҳли тиҷорати Тоҷикистону Украина баргузор гардида, дар он Шариф Сайид аз таъсиси Шӯрои тоҷирони Тоҷикистону Украина хабар дода, зикр намуд, ки Тоҷикистон ҳамаи имконияти расидан ба сатҳи нави муносиботи тиҷоратиро дорад.