Нақшаи кишоварзон иҷро шуд

Душанбе, 17 январ. (АМИТ «Ховар», Лаззат Диловарзод).- Дар нишасти матбуотие, ки дар Вазорати кишоварзӣ баргузор шуд, муовини вазири кишоварзӣ Сиҷовуддин Исроилов соли 2011 –ро барои кишоварзон соли бобарор хонд. Дар ин сол нақшаи истеҳсоли пахта 106,6 фоиз, картошка — 114, сабзавот -109, мева – 117, ангур – 125, тухм -110, моҳӣ- 125 ва истеҳсоли асал ба андозаи 100 фоиз иҷро гардид. Бо Қарори Ҳукумати ҶТ дар соли 2011 Шӯрои амнияти озуқаворӣ таъсис ёфт. Дар ин сол дар мавзеи Чимтеппа – и ноҳияи Рӯдакӣ аввалин озмун – намоиши ҷумҳуриявии «Чорво ва паррандаи сермаҳсул» гузаронида шуд. Дар ин сол аз Федератсияи Русия барои беҳтар намудани зоти моҳӣ 20 млн. дона кирминамоҳӣ ворид ва дастраси моҳипарварон гардонида шуд. Дар соли 2011 мутахассисони соҳаи чорвопарварӣ 250 сар гӯсолаи сермаҳсули зоти сиёҳалоро аз Ҷумҳурии Беларус, 2200 воя нутфаи бузҳои ангориро аз Иёлоти Муттаҳидаи Амрико ба Тоҷикистон ворид намуданд. Муовини вазир иштирокдорони нишасти матбуотиро бовар кунонид, ки дастовардҳои кишоварзон дар соли 2012 аз ин ҳам бештару беҳтар хоҳад шуд. Дар соли 2012 аз тариқи лизинг ворид намудани техникаи кишоварзӣ деҳқонро аз супоридани андози иловашуда ва гумрукӣ озод хоҳад кард ва ин яке аз он сабукиҳое мебошад, ки дар соли ҷорӣ Ҳукумати ҷумҳурӣ барои кишоварзон пешбинӣ кардааст,- таъкид шуд дар нишаст. Нишасти матбуотӣ дар фазои ҳамдигарфаҳмӣ ва озод гузашт.