Дар Тоҷикистон клуби забони куриёӣ кушода мешавад
Душанбе, 16 феврал. (АМИТ «Ховар», Лутфия Эшонқулова). – Сардори Хадамоти муҳоҷирати назди Ҳукумати ҶТ Сафиалло Девонаев ва вакили муваққатии корҳои Сафорати Ҷумҳурии Куриё Ён Ҷон – Ку масъалаи дар Тоҷикистон ташкил намудани клуби омӯзиши забони куриёйиро муҳокима намуданд. Тавре аз маркази матбуоти хадамоти мазкур ба АМИТ «Ховар» хабар доданд, С.Девонаев бо назардошти рушди муносибатҳои дуҷонибаи тиҷоратию иқтисодӣ ва илмию фарҳангии байни Тоҷикистону Куриё пешниҳод намуд, ки клуби забони куриёӣ ташкил карда шавад.Дипломати Куриё ин ташаббусро дастгирӣ намуда, дар навбати худ итминон дод, ки сафорати кишвараш барои ташкили клуб ҳамаҷониба кӯмак хоҳад кард. Қобили зикр аст, ки аз ин пеш дар назди Хадамоти муҳоҷират клуби забони англисӣ таъсис дода шуда буд.