Дастаи мунтахаби Тоҷикистон: омодагӣ бо мураббии ҷадид

Душанбе, 14 январ. ( АМИТ «Ховар», Аловиддин Бӯриев).- Дастаи мунтахаби футболи мамлакат имрӯзҳо тайёрии худро ба бозии охирини гурӯҳии Ҷоми ҷаҳон бо дастаи Куриёи Шимолӣ, ки рӯзи 29 феврал дар шаҳри Хуҷанд барпо мегардад, дар шаҳри Белеки Туркия идома медиҳад. Сармураббии ба тозагӣ интихобшудаи тими мо Камол Алиспахич бо футболбозон шинос шуда, дар якҷоягӣ бо Мубин Эргашев ва Аслиддин Ҳабибуллоев дар як рӯз ду маротиба ба онҳо машқ медиҳад. Алҳол дар ҳайати даста 21 нафар бозингар ба машқҳо фаро гирифта шудаанд. Нуриддин Давронов ҳамлагари клуби «Истиқлол»–и Душанбе ба даста рӯзи 16 феврал ҳамроҳ мешавад. Тавре ки сухангӯи ФФТ Фаридун Солиев хабар медиҳад, футболбозони тоҷик дар як меҳмонхона бо дастаҳои «Химки»-и Русия, «Андиҷон»-и Ӯзбекистон, инчунин дастаҳои футболи Молдова, Руминия ва Норвегия дар меҳмонхонаи «Аркадия Голф энд Спорт Резорт» маскан гирифтаанд. Гузаронидани ду бозии таҷрибавӣ ва дӯстона бо тимҳои ҳузурдошта дар назар аст.