Сарҳади давлатӣ муайян шуд?

Душанбе, 1 феврал. (АМИТ «Ховар», Лаззат Диловарзод).-Яке аз самтҳои фаъолияти Кумитаи давлатии заминсозӣ ва геодезии ҷумҳурӣ масъалаи делимитатсия (тақсим) ва демаркатсия (муайян кардани сарҳад) –и давлатии Ҷумҳурии Тоҷикистон бо давлатҳои ҳамсарҳад ба ҳисоб меравад.Дар давоми соли 2011 кормандони кумита дар ҳайати комиссияи байниҳукуматии Тоҷикистону Қирғизистон доир ба делимитатсия ва демаркатсияи сарҳади давлатӣ дар ҷаласаҳое, ки дар шаҳри Душанбе ва моҳи ноябри соли 2011 дар шаҳри Бишкеки Ҷумҳурии Қирғизистон, инчунин дар вохӯриҳои ҳайати гурӯҳи кории топографӣ моҳҳои март – августи соли 2011 дар шаҳри Исфана ва шаҳраки Дорот — Қӯрғони Ҷумҳурии Қирғизистон ва моҳи декабри соли 2011 дар шаҳри Хуҷанд баргузор гардиданд, иштирок намуда, аз натиҷаи гуфтушунидҳо ба таври расмӣ ба Ҳукумати Ҷумҳурии Тоҷикистон гузориши муфассал пешниҳод намуданд. Аммо барои пурра анҷом додани масъалаи аломатгузорӣ дар сарҳад боз корҳои зиёд дар пеш аст. Ба иттилои манбаъ, дар соли 2012 гуфтушунид оид ба масъалаи аломатгузории сарҳадӣ миёни ҷумҳуриҳои Тоҷикистон, Ӯзбекистон, Қирғизистон идома хоҳад ёфт. Дар назар аст, ки моҳи феврали соли ҷорӣ аввалин гуфтушунид дар шаҳри Душанбе доир мегардад, ки он барои тарафҳо хеле ҷолиб хоҳад буд.