Иҷрои фармоиши маскавиҳо
Душанбе, 30 март. (АМИТ «Ховар», Лаззат Диловарзод).- Бори дуюм аст, ки ширкати «Ҷинсмейкерс» -и шаҳри Маскав бо корхонаи «Текстил Сити»-и шаҳри Хуҷанд, ки ба коркарди нахи пахта ва истеҳсоли либос машғул мебошад, шартнома мебандад. Бино ба гуфти директори кулли ҶДММ «Текстил Сити» Насим Каримов, корхона дар асоси шартнома ба истеҳсоли маҳсулоти фармоишӣ барои ширкати «Ҷинсмейкерс» ба маблағи 500 ҳазор доллари амрикоӣ фаъолияташро ба роҳ мондааст. Ба гуфти Н.Каримов корхона бар асоси шартнома як миқдор моли истеҳсолшударо, ки аз 10 намунаи шиму курта иборат аст, то 10-уми апрели соли ҷорӣ ба фармоишгар интиқол медиҳад. Ин иҷрои дуюмин шартномаест, ки бар асоси фармоиши ширкатҳои Маскав амалӣ мегардад. Аввалин шартнома соли 2011 ба маблағи 1 млн. доллари амрикоӣ бо ширкати «Швейпромсервис»-и Маскав ба имзо расида буд, ки «Текстил Сити» то имрӯз барояш маҳсулоти фармоишӣ истеҳсол менамояд.Дар айни замон дар корхонаи «Текстил Сити» наздик ба 400 нафар коргар фаъолият доранд. Корхона дар давоми моҳҳои январ – феврали соли ҷорӣ нисбат ба ҳамин давраи соли 2011 103 фоиз маҳсулот истеҳсол намудааст.