Ҳисоботи Вазорати молияи ҶТ дар бораи хатарҳои буҷавӣ

Душанбе, 12 апрел. (АМИТ «Ховар», Покиза Маҳмадбекова). – Вазорати молияи Ҷумҳурии Тоҷикистон дар бораи хатарҳои буҷавии марбут ба муассисаю корхонаҳои давлатӣ ҳисобот дод. Мувофиқи хабари Вазорати молияи кишвар, мақсад аз ҳисобот муайян намудани хатарҳои мушаххаси буҷавии марбут ба корхонаю муассисаҳои давлатӣ ва таъсири онҳо ба вазъи ояндаи молиявии давлат мебошад. Ҳангоми тартиб додани ин ҳисобот маълумоти молиявӣ то 31 декабри соли 2011 мавриди истифода қарор гирифт. Дар ҳисобот ҳамчунин дар бораи қарзҳои калонтарини дебиторию кредитории корхонаҳо оварда шудааст.Қарздори калонтарини «Талко» ширкати «Герберт Смит» мебошад, ки қарзи он барои хариди алюминий 249 миллиону 419 ҳазору 500 сомониро ташкил медиҳад. Қарзи дебитории «Барқи тоҷик» чунин аст: қарзи умумии корхонаю ташкилотҳо – 33 миллиону 100 ҳазор сомонӣ, қарзи умумии аҳолӣ — 276 миллиону 500 ҳазор сомонӣ ва қарзи Вазорати мелиоратсия ва захираҳои об – 182 миллиону 500 ҳазор сомонӣ.Дар ҳисобот ҳамчунин гуфта мешавад, ки қарздори калонтарин аз рӯи андозҳо «Барқи тоҷик» мебошад, қарзи он 80,4 фоизи ҳамаи қарзҳои андозро ташкил медиҳад.