«Алмос» ба Тоҷикистон техника меорад
Душанбе, 12 июн. (АМИТ «Ховар», Дилшодаи Хайруллоҳ).- Бо мақсади рушди ҳамкориҳои дуҷониба дар соҳаи техникаи кишоварзӣ дар Вазорати кишоварзии Ҷумҳурии Тоҷикистон вохӯрии як гурӯҳ мутахассисони вазорат таҳти роҳбарии вазири кишоварзӣ Қ.Қосимов бо гурӯҳи намояндагони Федератсияи Русия таҳти роҳбарии директори генералии ООО «Агрофирма КР и ММ» Г.А.Рязанов доир гардид. Дар вохӯрӣ вазири кишоварзӣ Қ.Қосимов натиҷаи ҳамкориҳои дуҷонибаро дар кори ворид намудани техникаи кишоварзӣ ва таъмини тухмиҳои хушсифати картошка аз Федератсияи Русия изҳори қаноатмандӣ намудСипас роҳбари ҳайати гурӯҳи кори Русия Г.А.Рязанов рушди ҳамкориҳоро мусбат арзёбӣ намуда, қайд кард, ки Русия дар оянда низ ҳамкориҳои дуҷонибаро бо Вазорати кишоварзии Ҷумҳурии Тоҷикистон боз ҳам мустаҳкам менамояд. Соли ҷорӣ бо ин мақсад барои кишти тирамоҳӣ аз Федератсияи Русия 3 тонна тухмии картошка ва барои кишти баҳории соли оянда навъҳои гуногуни тухмии картошка ба Тоҷикистон ворид карда мешавад. Ҳамзамон директори генералии ширкати савдои «Алмос» А.И Попов зикр намуд, ки корхонаи онҳо, ки бештар ба фурӯши қисмҳои эҳтиётии техникаи кишоварзӣ машғул аст, дар оянда ба мушкилиҳои роҳ нигоҳ накарда, омодааст бо Тоҷикистон ҳамкориҳои самарабахшро анҷом диҳад.Директори генералии ЗАО «Колнаг» А.В.Алдошкин қайд намуд, ки баҳри ворид намудани техникаи кишоварзӣ омодааст дар оянда дар Тоҷикистон истгоҳи трактор ва мошиниро таъсис (МТС) намояд. Дар охир вазири кишоварзӣ Қ.Қосимов аз натиҷаи ҳамкориҳо бо мутахассисони Федератсияи Русия изҳори қаноатмандӣ намуда, ба ҳайати гурӯҳи корӣ барои баргузории як вохӯрии самарабахш изҳори миннатдорӣ намуд.