Бо насби беш аз 70 ҳазор ҳисобкунак талафот кам мешавад

Душанбе, 8 июн.(АМИТ «Ховар», Марзия Саидова).-Масъалаҳои марбут ба татбиқи марҳилаи дуюми Лоиҳаи таъмини оби пойтахт дар меҳвари мулоқоти раиси шаҳри Душанбе Маҳмадсаид Убайдуллоев ва сарвари намояндаи доимии Бонки Ҷаҳонӣ дар Тоҷикистон хонум Марша МакГро Олив қарор доштанд. Барои татбиқи ин лоиҳа Бонки Ҷаҳонӣ 16 миллион $ -ро ҳамчун қарзи бебозгашт ҷудо мекунад ва шаҳрдорӣ ба он 3 миллион $ -и дигарро изофа менамояд. Назар ба иттилои Шавкат Саидов, котиби матбуотии раиси шаҳри Душанбе, мусоҳибон зимни мулоқот ҷараёни корҳои анҷомёфтаро мусбат арзёбӣ карданд. Зикр шуд, ки марҳилаи дуюми татбиқи лоиҳа баҳри ташкили фаъолияти самараноки КВД «Обу корези Душанбе» дар бобати коҳиши талафот ва сарфаи оби истеҳсолшуда 76, 5 ҳазор ҳисобкунаки об дар манзилҳои муштариён насб мешаванд. Инчунин ба пуррагӣ иваз намудани филтрҳои обполоишӣ дар истигоҳҳои дахлдори КВД «Обу корези Душанбе» мувофиқи мақсад аст. Дар робита ба ин Маҳмадсаид Убайдуллоев аз масъулини Бонки Ҷаҳонӣ хоҳиш намуд, ки масъалаи мазкурро мавриди омўзиш қарор дода, ҷиҳати татбиқи он пешниҳод ироа созанд.