Роҳандозии як барнома барои бемориҳои қалб
Душанбе, 6 июн. (АМИТ «Ховар», Лаззат Диловарзод).- Аз рӯи таҳлилҳои пешакии омории афзоиши аҳолӣ дар Тоҷикистон, аз 1000 кӯдаки зиндатаваллуд 8 кӯдак бо нуқсони модарзодии дил ба дунё меояд, ки 75 фоизи онҳо то якмоҳагӣ ва сеякашон то яксолагӣ мефавтанд. Инро духтурони қалбшинос нишондиҳандаи хеле бад миёни дигар давлатҳои ИДМ медонанд.«Чун Ҷумҳурии Тоҷикистон аз ҷиҳати шумораи таваллуд нишондиҳандаи баландро миёни Иттиҳоди Давлатҳои Мустақил қоил аст, падару модарон ба фарзандон — онҳое, ки бо бемории қалб ба дунё меоянд, чандон таваҷҷӯҳ надоранд»,- мегӯяд мудири шӯъбаи ҷарроҳии дили Маркази ҷумҳуриявии дилу рагҳо Абдусодиқ Абдуҷабборов.Тибқи маълумоти Вазорати тандурустии ҶТ, дар айни замон дар ҷумҳурӣ 7 ҳазор нафар ба бемории қалб гирифтор аст, ки 4 ҳазор нафарашонро кӯдакони синни аз 1 то 12 сола ташкил медиҳанд.Духтурони қалбшинос дар андешаи онанд, ки барои беҳбуд бахшидани ин навъи беморӣ барномае роҳандозӣ гардад, ки барои пешгирӣ ва табобати бемории қалб мусоидат карда тавонад, зеро серфарзандии сокинони ҷумҳурӣ ва камбизоатии аҳолии кишвар имкони пешгирӣ ва табобати ин бемориро надорад.