Вохӯрии вазири корҳои дохилии ҶТ бо сафири Британия
Душанбе, 22 июн. (АМИТ «Ховар», Мавҷуда Анварӣ).- Вазири корҳои дохилӣ генерал-лейтенанти милитсия Рамазон Раҳимов дирӯз, 21 июн бо Сафири Фавқулодда ва Мухтори Иттиҳодияи Шоҳигарии Британияи Кабир ва Ирландияи Шимолӣ дар Ҷумҳурии Тоҷикистон Робин Орд Смит мулоқот доир намуд. Бинобар иттилои сомонаи расмии ВКД, дар мулоқоти мазкур муовини Сафир ҷаноби Марк Вудхам низ иштирок намуд. Дар ҷараёни вохӯрӣ Вазири корҳои дохилӣ ҷаноби Робин Орд Смитро ба муносибати ба вазифаи пурмаҳсули дипломатӣ, Сафири Фавқулодда ва Мухтори Иттиҳодияи Шоҳигарии Британияи Кабир ва Ирландияи Шимолӣ дар Ҷумҳурии Тоҷикистон таъин гардиданаш табрик намуд. Инчунин Вазири корҳои дохилӣ доир ба фаъолияти Вазорати корҳои дохилии Ҷумҳурии Тоҷикистон дар самти мубориза бо ҷинояткорӣ, гардиши ғайриқонунии маводи мухаддир, терроризм ва рафти ислоҳоти милитсия суханронӣ намуд. Дар хотима тарафайн аз вохӯрӣ изҳори қаноатмандӣ намуда қайд карданд, ки дар оянда ҳамкориҳоро вусъат хоҳанд дод.