Қабули барномаҳои давлатии рушди хоҷагии ҷангал

Душанбе, 15 август. (АМИТ «Ховар», Лаззат Диловарзод).- Дар доираи «Барномаи давлатии рушди хоҷагии ҷангали Ҷумҳурии Тоҷикистон барои солҳои 2006 — 2015» ва «Барномаи парвариш, ҷамъоварӣ, коркарди гиёҳҳои шифобахш ва тайёр намудани доруворӣ аз онҳо барои солҳои 2006 -2014» корҳои судманд анҷом дода шудаанд,- иброз дошт раиси Кумитаи ҳифзи муҳити зисти назди Ҳукумати ҷумҳурӣ Талбак Салимов ба мухбири АМИТ «Ховар». Ба иттилои манбаъ, дар ин муддат (солҳои 2006 то моҳи июли 2012) дар майдони 1607 гектар корҳои бунёд ва барқарор кардани ҷангалзор анҷом дода шуданд. Аз ҷумла, дар давоми соҳои 2006 -2011 дар 605 гектар сабзиши пурраи даҳҳо навъи дарахтони босамару сояафкан бо роҳи кишту парвариши он таъмин гардид. Дар давоми шаш соли охир дар майдони 1002 гектар садҳо ҳазор ниҳоли дарахтони босамару сояафкан ва гулу буттаҳо шинонида шудаанд. Аз миқдори умумии замини ҷангали бунёдгардида, барои беҳдошти чарогоҳҳои фонди давлатии ҷангал дар масоҳати 244 гектар, аз ҷумла дар хоҷагии ҷангали вилояти Суғд 64 гектар, ба номи Ҳувайдуллоев -80, Шаҳритус-60 ва хоҷагии ҷангали ноҳияи Қубодиён дар майдони 40 гектар тухми саксавул кишт шудааст, ки ба иқлими ин ҷойҳо хеле мувофиқ аст.