Гаравгонгирӣ бо талаби маблағи калон

Душанбе, 8 август. (АМИТ «Ховар»).-Прокуратураи генералии Ҷумҳурии Тоҷикистон иттилоъ медиҳад, ки Маҳмадсалимов Ёдгор дар давоми солҳои 2002-2012 аз ҳисоби ҷавонон ва сокинони Вилояти Мухтори Кӯҳистони Бадахшон, аллалхусус деҳаи Поршневи ноҳияи Шуғнон гурӯҳи (дастаи) мусаллаҳи устувор созмон дода, онҳоро бо яроқу лавозимоти ҷангӣ мусаллаҳ намудаааст, ки тайи даҳ соли охир аъзои он гурӯҳ ба содир намудани ҷиноятҳои вазнин ва махсусан вазнин даст задаанд.
Чунончи, 09 ноябри соли 2011 аъзоёни гурӯҳи (дастаи) мусаллаҳи Мамадасламов Ё. бо номҳои «Карим», «Парвиз», «Хушдил» ва дигарон, ҷамъ 10-15 нафар шаҳрванд М.Ҷ.-ро, ки барои ҳалли корҳои тиҷоратии худ дар шаҳри Хоруғ қарор дошт, аз меҳмонхона гирифта, ба деҳаи Поршневи ноҳияи Шуғнон бурдаанд.
Дар ин ҷо ин гурӯҳи мусаллаҳ М.Ҷ.-ро гаравгон гирифта, дар дохили як хона маҷбуран нигоҳ дошта, бо таҳдиди куштан аз наздикони ӯ ҳамчун шарти озод намуданаш маблағи 35000 доллари ИМА талаб намуданд. Вале 30 ноябри соли 2011 бо дахолати Раёсати КДАМ Ҷумҳурии Тоҷикистон дар Вилояти Мухтори Кӯҳистони Бадахшон ӯ озод карда шудааст.
Бинобар ин, аз тарафи гурӯҳи фаврию тафтишотии Прокуратураи генералии Ҷумҳурии Тоҷикистон рӯзи 07.08.с.2012 нисбати Мамадасламов Ёдгор ва дигарон бо моддаи 181 қисми 3 банди «а» Кодекси ҷиноятии Ҷумҳурии Тоҷикистон(барои ғасби гаравгон) парвандаи ҷиноятӣ оғоз карда шуда, тафтишоти он идома дорад. Маркази ахбори Прокуратураи генералии Ҷумҳурии Тоҷикистон