Барномаи идонаи ҳунарӣ ба ифтихори Рӯзи истиқлолият

Душанбе, 7 сентябр.(АМИТ «Ховар», Людмила Дубинина).- Бо ташаббуси мақомоти иҷроияи ҳокимияти давлатии шаҳри Душанбе 9 сентябр дар майдони «Наврӯзгоҳ» бахшида ба таҷлили 21-умин солгарди истиқлолияти давлатии Тоҷикистон барномаи идонаи ҳунарӣ таҳти унвони «Нишоти истиқлолият» намоиш дода мешавад. Мувофиқи суханони роҳбари бадеии барнома, Ҳунарпешаи мардумии Тоҷикистон Набӣ Ҷалолов, дар ин чорабинӣ дар баробари ҳунарпешагон сарбозон, донишҷӯёни донишкадаҳои тарбияи ҷисмонӣ, санъат ва консерватория низ иштирок мекунанд. Барномаи намоиши ҳунарӣ иборат аз рақсу суруд дар иҷрои ҳамаи дастаҳои маъруфи ҳунарӣ, балет ва санъати эстрадӣ мебошад. Имсол дар ин чорабинӣ, ба ҷузъ донишҷӯёни мактабҳои олии бахши фарҳанг, хонандагону донишҷӯён сафарбар карда намешаванд. Ғайр аз ин, ба барномаи намоиш ҳунарнамоии варзишгарон бо иштироки варзишгари номии тоҷик, дорандаи медали биринҷии Бозиҳои олимпӣ дар шаҳри Лондон Мавзуна Чориева шомил шудааст.