Роҳандозии «Маркази ҷадиди омӯзишӣ»

Душанбе, 12 сентябр. (АМИТ «Ховар», Сарвинози Рӯҳуллоҳ). – Ҳамакнун Кумитаи имдоди Имом Хумайнӣ дар Тоҷикистон тасмим дорад, дар вилояти Суғд “Маркази ҷадиди омӯзишӣ” барои ҷавонписаронро роҳандозӣ кунад. Дар ин бора Саидҷалоли Разавӣ раҳбари кумитаи мазкур дар як нишасти матуботӣ дар шаҳри Душанбе ба хабарнигорон иттилло дод. Номбурда гуфт, ки дар расми ифтитоҳи он Ҳусайни Анворӣ, сарпарасти Кумитаи имдоди Имом Хумайнӣ, ки ба Тоҷикистон ташриф овардааст, иштирок мекунад. «Дар марказ ба ҷавонон касби кафшергарӣ, устои таъмири барқ ва сангтарош омӯзонида мешавад. Ва оғои Анворӣ бо зиёда аз 600 нафар коромӯзони кумитаи имдод дар шаҳру навоҳии гуногуни вилояти Суғд мулоқот анҷом хоҳад дод»,-гуфт С. Разавӣ. Зимнан ба иттиллои роҳбари кумитаи мазкур дар Тоҷикистон, рӯзи ҷумъа 14 сентябр дар «Хонаи Эрон», воқеъ дар маҳаллаи Гулистони шаҳри Душанбе намоишгоҳи маҳсулоти истеҳсолкардаи хонаводаҳое, ки таҳти сарпарастии Кумитаи имдод қарор доранд, баргузор гардида, ҷашни бошукӯҳи тавонмандсозии 1000 нафар аз хонаводаҳое, ки таҳти ҳимояти Кумитаи имдоди Имом Хумайнӣ қарор доранд, доир мешавад. Эҳтимол аст, пас аз баргузории ин чорабинӣ Саидмаҳдии Ибодӣ намояндаи дигари Ҷумҳурии Исломии Эрон раҳбарии бахши тоҷикистонии ин кумитаро ба ӯҳда гирад. Густариши робитаҳои ҳамаҷонибаи ҳамкории Кумитаи имдоди Имом Хумайнӣ бо Тоҷикистон мӯҳтавои ин сафар буда, тибқи барнома мулоқоти Ҳ. Анворӣ бо мақомоти баландпояи Тоҷикистон дар назар аст.