Вакилони парлумон ба фаъолият шурўъ мекунанд

Душанбе, 28 сентябр.(АМИТ «Ховар», Марзия Саидова).- 1 октябр дар шаҳри Душанбе ҷаласаи якуми иҷлосияи чоруми палатаи поёнии парлумони мамлакат –Маҷлиси намояндагон даъвати чорум оғоз меёбад. Аз палатаи поёнии парлумони мамлакат ба АМИТ «Ховар» иттилоъ доданд, ки дар ҷараёни ҷаласа вакилони Маҷлиси намояндагон маҷмўи масъалаҳои марбут ба рушди ҳаёти иқтисодию иҷтимоии кишварро матраҳ хоҳанд кард. Дар ҷаласа баррасии лоиҳаи қонунҳои Ҷумҳурии Тоҷикистон «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи Гвардияи миллии Ҷумҳурии Тоҷикистон», «Дар бораи иҷозатномадиҳӣ ба баъзе намудҳои фаъолият», «Дар бораи ворид намудани тағйирот ба Кодекси мурофиавии ҷиноятии Ҷумҳурии Тоҷикистон» ва дигар масъалаҳо дар назар аст. Бояд тазаккур дод, ки вакилони палатаи поёнии парлумони мамлакат аз 2 июл то 15 августи соли равон дар таътили тобистона қарор доштанд. Дар зарфи якуним моҳ- аз 15 август то охири сентябр вакилон дар минтақаҳои гуногуни кишвар бо интихобкунандагон ва мардум доир ба масъалаҳои мубрами ҷомеа мулоқот анҷом доданд.9.53.