6000 зоир озими ҳаҷ шуд

Душанбе, 1 октябр. (АМИТ «Ховар», Дилшодаи Хайруллоҳ)- Нахустин сафари зоирини точик ба самти Душанбе — Ҷидда субҳи рӯзи шанбе соати 4.40 дақиқа ба вақти маҳаллӣ сурат гирифт. Бояд зикр намуд, ки дар ин сафар ҳоҷиёни тоҷикро табибон ва роҳбаладон ҳамроҳӣ мекунанд. Имсол бори аввал аст, ки зоирин мустақиман аз ноҳияҳо ба «Фурудгоҳи байналмилалии Душанбе» омада, аз он ҷо ба хонаи Худо сафар мекунанд. Солҳои қаблӣ зоирин 3-4 соат қабл аввал ба Маркази Исломии Тоҷикистон ва сипас аз он ҷо ба фурудгоҳ меомаданд. Имсол тасмими гирифтаи Кумитаи корҳои дини назди Ҳукумати Ҷумҳурии Тоҷикистон доир ба сафари зоирин аз «Фурудгоҳи байналмилалии Душанбе» кори ҳаҷравандаҳоро ба маротиб осон намуд, зеро ки зоирин танҳо 3 соат қабл аз парвоз дар фурудгоҳ ҷамъ меоянд. Имрӯз 5-умин парвози ҳоҷиён ба самти Душанбе — Ҷидда соати 21. 00 ба вақти маҳаллӣ сурат мегирад. Тӯли солҳои охир сатҳу сифати хизматрасониҳо ба зоирин дар Маккаи мукаррама ва Мадинаи мунаввара ба маротиб боло рафтааст ва яке аз ин бартариҳо бори нахуст дар баробари дигар кишварҳо бо либоси ягона ва дорои нишонаҳо ва парчами Тоҷикистон будани зоирини тоҷик маҳсуб меёбад. Бояд зикр намуд, ки маҷмӯи либосҳо барои зоирин ду ҷуфт либос, як ҷузвдон, як ҷузвдони дастӣ, як ҷуфт пойафзол, бейҷик ва китобчаи “Роҳнамои ҳаҷ ва умра”-ро дар бар мегирад. Имсол теъдоди зоирини тоҷик 6000 нафарро ташкил медиҳад.