Рушди ҳамкориҳо бо давлати Қатар

Душанбе, 19 октябр. (АМИТ «Ховар»).- Рӯзи гузашта дар «Кохи Ваҳдат»-и шаҳри Душанбе аъзоёни ҳайати Комиссияи муштараки байнидавлатии Қатар бо ҳамтоёни тоҷики худ аввалин ҷаласаи корро таҳти роҳбарии вазири кишоварзӣ Қ.Қосимов, ки ҳамраиси ҷониби Тоҷикистон аст, баргузор намуданд. Гурӯҳи бонуфузи бистудунафараи ҷониби Қатарро муовини вазири кор ва тиҷорати ин кишвар ҷаноби Султон ибни Рашид ал-Хотир роҳбарӣ намуда, намояндгони вазортау ташкилотҳои давлатӣ ва ширкатҳои бузурги Қатар ба он шомиланд. Зимни баромади худ вазири кишоварзӣ қайд намуд ки нахустин муносибатҳои дипломатии байни давлатҳои мо, ҳанӯз 13 декабри соли 1994 дар ҷараёни вохӯриҳои сарони давлатҳои аъзои Созмони Конфронси Исломӣ дар Доха барқарор шуда буданд.Ташрифи расмии Президенти Ҷумҳурии Тоҷикистон Ҷаноби Олӣ, Эмомалӣ Раҳмон ба Давлати Қатар дар моҳи майи с. 2007 ва ташрифи расмии ҷавобии амири Давлати Қатар – Ҷаноби Ҳамад ибн Халиф ал-Тани моҳи августи ҳамон сол ҷиҳати таҳким ва рушди ин робитаҳо такони ҷиддӣ дода, барои тавсеаи ҳамкориҳои мутақобилан судманди ҳар ду кишвар асоси воқеӣ гузошт. Дар ҷараёни ин ташрифҳо, байни давлатҳои мо як қатор ҳуҷҷатҳои шартномавии ҳуқуқӣ оид ба ҳамкориҳои тиҷоратию иқтисодӣ ва техникӣ, дар соҳаи ҷалби сармояи тарафайн, дар соҳаи занбӯриасалпарварӣ, инчунин як қатор созишномаҳо байни вазоратҳои корҳои хориҷӣ ва палатаҳои савдо ва саноати ҳар ду кишвар ба имзо расиданд.Ҷаноби Султон ибни Рашид ал-Хотир аҳамияти ҳамкориҳои судмандро дар соҳаҳои гидроэнергетика, корарди канданиҳои фоиданок, кишоварзӣ ва фарҳангу саёҳӣ аз самтҳои афзалиятнок иброз намуд. Тибқи нақшаи тарафайн натиҷаи кори Комиссияи муширак имрӯз, 19 октябр ҷамбаст гардида, соати 13-00 маросими баимзорасонии «Протоколи ҷамъбасти»-и Комиссияи муштараки иқтисодӣ ва ҳамкории техникии байни Тоҷикистону Қатар дар назар аст.