Барои сохтани нерӯгоҳҳо аз таҷрибаи Шветсария истифода мешавад?

Душанбе, 2 ноябр. (АМИТ «Ховар», Афшини Муқим)- Дар мулоқоти Президенти Ҷумҳурии Тоҷикистон Эмомалӣ Раҳмон ва роҳбари Шӯрои палатаи болоии Парлумони Шветсария Ханс Алтер масоили ҳамкории мутақобилаи Тоҷикистону Шветсария мавриди баррасӣ қарор гирифт. Ба гуфти Ханс Алтер дар ин мулоқот бештар ба масоили ҳамкориҳои иқтисодии байни ду кишвар ва инчунин роҷеъ ба муколамаҳое, ки фарогири мавзуоти ҳуқуқӣ ҳастанд, таваҷҷӯҳ зоҳир гардидааст. Тибқи иловаи номбурда чун Тоҷикистон кишвари дорои захираҳои фаровони табиӣ маҳсуб меёбад, аз ин рӯ метавон ҷиҳати коркарди ин захираҳо дар дохили мамлакат ҳамкориҳои ба ҳар ду ҷониб судмандро ба роҳ монд. «Мо метавонем ҷиҳати дастрас намудани технология ва таҷҳизот дар самти коркарди алюминий ва истеҳсоли барқ ба Тоҷикистон мусоидат намоем»- иброз дошт Ханс Алтер. Гуфта шуд, чун Шветсария дар самти бунёди нерӯгоҳҳои барқи обӣ дорои таҷрибаи бузург аст, аз ин лиҳоз мубодилаи таҷрибаи мутахассисони ду кишвар дар ин соҳаи ҳаётан муҳим низ ба манфиати кор дониста шуд.