Бемориҳои сироятӣ коҳиш ёфтанд

Бино ба маълумоти Вазорати тандурустии ҷумҳурӣ дар моҳҳои январ-сентябри соли 2012-ум 51 ҳазору 404 ҳодисаи ба бемориҳои сирояткунанда гирифтор шудани аҳолӣ ба қайд гирифта шудааст, ки нисбат ба ҳамин давраи соли 2011 ба андозаи 19,1 фоиз камтар аст. Солҳои охир ду навъи беморӣ-гепатити шадиди сироятӣ ва бемории сироятии шадиди рӯда бештар миёни аҳолӣ ба қайд гирифта мешавад. Дар 9 моҳи соли ҷорӣ бемории сироятии шадиди рӯда 72,6 фоиз ва гепатити шадиди сироятӣ 9,9 фоизи бемориҳоро ташкил дод, ки ин нисбат ба соли 2011 (14 ҳазору 483 ҳодисаи гирифторӣ ба ин бемориҳо) 3 ҳазор камтар аст. Хушбахтона, бемориҳои исҳоли хунини бактериалӣ сол то сол дар кишвар кам мегарданд. Агар дар 9 моҳи соли 2011 10 ҳазору 79 ҳодисаи бемории исҳоли хунини бактериалӣ қайд шуда бошад, дар 9 моҳи соли ҷорӣ ҳамагӣ 748 ҳолати ин беморӣ ба қайд гирифта шудааст.Дар 9 моҳи соли ҷорӣ 4773 ҳодисаи ба бемории гепатити А, 195 ҳодисаи ба бемории гепатити В, 63 ҳодисаи бемории гепатити С ва 50 ҳодисаи ба гепатити музмин гирифтор шудани аҳолӣ ба қайд гирифта шудааст, ки 19,1 фоизи умумии бемориҳоро ташкил медиҳад.Дар давоми моҳҳои январ-сентябри соли ҷорӣ ҳамчунин 36 ҳазору 49 ҳодисаи ба бемориҳои паразитӣ гирифтор шудани аҳолӣ низ ба қайд гирифта шудааст, ки нисбат ба ҳамин давраи соли гузашта 2,8 фоиз зиёд аст.