Cуҳбати хонандагон бо кормандони Агентӣ

Душанбе, 7 ноябр. (АМИТ «Ховар» Ибодат Давлатова).- Бештар аз 60 нафар хонандагону омӯзгорони мактаби таҳсилоти ҳамагонии рақами 7 –и шаҳри Душанбе шоҳиди як суҳбати мутахассисон дар мавриди маводи мухаддир, оқибатҳои ҳалокатбори истеъмоли мухаддирот ва ширкат дар муомилоти ғайриқонунии маводи нашъадор шуданд.Тавре ки ба мухбири АМИТ «Ховар» аз маркази матбуоти Агентии назорати маводи нашъаовари назди Президенти ҶТ иттилоъ доданд, дар мулоқоти кормандони Агентӣ асосан хонандагони синфҳои болоӣ ширкат доштанд. Ба иштирокдорони он оид ба тарбияи ҷавонон ва насли наврас, пешгирии нашъамандӣ ва нашъаҷаллобӣ, бемориҳои сироятӣ, аз қабили ВНМО\БПНМ, ҷинояткорӣ дар байни ҷавонон, даст задани ҷавонон ба ҳар гуна амалҳои номатлуб суҳбат баргузор гардид. Инчунин устодони мактаб дар вохӯрӣ фикру мулоҳизаҳои худро низ иброз намуда, тасмим гирифтанд, ки дар оянда дар байни тамоми мактаббачагон чунин вохӯриҳо мунтазам гузаронида шаванд. Дар ҷамъбаст ба ҳамаи иштирокчиён варақаҳои иттилоотӣ тақсим карда шуд.