Даъвати иҷлосияи дувоздаҳуми ММ МО ҶТ

Душанбе, 29 ноябр.(АМИТ «Ховар», Марзия Саидова).- 13 декабри соли равон дар шаҳри Душанбе иҷлосияи дувоздаҳуми Маҷлиси миллии Маҷлиси Олии Ҷумҳурии Тоҷикистон даъвати чорум баргузор мегардад. Раиси палатаи болоии парлумони ҷумҳурӣ Маҳмадсаид Убайдуллоев 29 ноябр қарори марбутаро ба тасвиб расонд. Дар ин бора ба АМИТ «Ховар» аз Маҷлиси миллӣ иттилоъ доданд. Аъзои Маҷлиси миллӣ дар ҷараёни иҷлосия маҷмўи масъалаҳои марбут ба рушди соҳаҳои иқтисодию, иҷтимоӣ ва фарҳангии кишварро мавриди баррасӣ қарор медиҳанд. Аз ҷумла, аъзои палатаи болоии парлумони мамлакат Кодекси шаҳрсозии Ҷумҳурии Тоҷикистон, Қонунҳои Ҷумҳурии Тоҷикистон «Дар бораи шарикии давлат ва бахши хусусӣ», «Дар бораи экспертизаи зиддикорупсионии санадҳои меъёрию ҳуқуқӣ ва лоиҳаҳои санадҳои меъёрии ҳуқуқӣ», «Дар бораи ҳифзи ҳавои атмосфера», «Оид ба ворид намудани тағийру иловаҳо ба Қонуни Ҷумҳурии Тоҷикистон «Дар бораи хизмати давлатӣ»-ро муҳокима ва ҷонибдорӣ хоҳанд кард.